Nic nie pumoże trzeja bydzie dzisio zaś pomaluśku pokraczować ku wyrchu Głymbokóm, kaj pod nomerym sztyry a dwacet trefiymy na maluśki kszeft s jedzynim. Skyrs czymu łón sie mianuje jako taki zielóne stworzyni ze stawu tego nie wiym, ale możne tymu, że wartko hópko jako ludzie kierym chybiło jedzynio i prawióm, że trzeja wartko hópnóć kansi cosi kupić. Gor moc razy tam u nich sie pokazujóm tustelocy, kierym chybiło za dnia czasu, a u nich je odewrzite aże kansi do nocy. Kónsek dalij poradzymy se pomaszkiecić i pogłoskać podniebiyni lodami, kierych tam majom tak moc, że wszedcy majóm wielkóm ostude jakimi se połechtać w postrzodku wole. Ostude też bydymy mieli s tym bankym kiery mo zielóny szyld, bo tak jak inksze na zicher bydzie nas namowioł do niechanio se unich piniyndzy, abo weznóć pojczke na wysoki procynt. Ta chałupa, mo jednakowóż wielkóm tradycyje skyrs tego, że rodził sie w ni Jerzy Trzanowski, kiery sie zasłóżył w pisaniu kościelnych pieśni. Wykształcił sie też na wanelickigo ksiyndza, ale nie podarziło mu sie nigdzi delij zagrzoć placu, bo był wszyndzi przeganiany skyrs swoji luterski wiary. Tak to czasym bywo, że coby żodnymu nie zawadzać lepszyj nie pokazować co sie mo duszy i swoji żywobyci przynś bez ostudy, aji s przibuznymi. Dzisio to uż nima ta samo chałupa, bo isto od starości ta piyrszo sie obaliła i trzeja było na tym starym placu postawić nowóm. Pore roków tymu egzystwała tam eszcze gospoda “Targowa”, ale prziszła moda na banki i dzisio nikierzi yno mogóm pospóminać jako sie tam kiejsi szło u nich fajnie dobrym jedzynim nabónckać.
Tóż miyjcie sie wszedcy dobrze i potkómy sie zaś za miesiónc.
pokraczować – podążać
kszeft – sklep
skyrs – z powodu
hópko – skacze
chybiło – zabrakło
prawióm – mówią
gor – zwłaszcza
odewrzite – otwarte
kónsek – kawałek
pomaszkiecić – posmakować
ostuda – kłopot
na zicher – na pewno
pojczka – pożyczka
skyrs – z powodu
żywobyci – życie
przibuzni – krewni
nikierzi – niektórzy
nabónckać – najeść
